துணை தலைவர் உட்பட பல நிர்வாகிகள் இராஜிணாமா- ஸ்தம்பித்தது மக்கள் நீதி மய்யம்

கமல் கூடாரம் - மய்யத்தில் ஜனநாயகம் இல்லை!

துணை தலைவர் உட்பட பல நிர்வாகிகள் இராஜிணாமா- ஸ்தம்பித்தது மக்கள் நீதி மய்யம்

ட்விட்டரில் அரசியல் கருத்துகளை தெரிவித்து வந்ததன் மூலம் ட்விட்டர் அரசியல் செய்கிறார் என்று விமர்சிக்கப்பட்ட கமல்ஹாசன், மக்கள் நீதி மய்யம் என்ற தனிக்கட்சியை ஆரம்பித்து, ரஜினி போல் அல்லாமல் கட்சி ஆரம்பித்த கையோடு, அவரது கட்சியை கடந்த நாடாளுமன்ற தேர்தலில் போட்டியிட வைத்தார்.

அந்த தேர்தலில் போட்டியிட்ட கமலின் மக்கள் நீதி மய்யம் கட்சி 3.77 சதவீத வாக்குகளையும் பெற்றது. தொடர்ந்து, நடந்து முடிந்த சட்டமன்றத் தேர்தலிலும் கமல்ஹாசனின் மக்கள் நீதி மய்யம் கட்சி களமிறங்கியது. அக்கட்சியின் தலைவர் கமல்ஹாசன் கோவை தெற்கு தொகுதியில் போட்டியிட்டார். சரத்குமாரின் சமக, பாரிவேந்தரின் ஐஜேகே ஆகிய கட்சிகளுடன் கூட்டணி அமைத்து தேர்தலை சந்தித்த மக்கள் நீதி மய்யம் அனைத்து தொகுதிகளிலும் தோல்வியடைந்தது. பல தொகுதிகளில் 3ஆம் 4ஆம் இடங்களை பிடித்தது.

அக்கட்சியின் தலைவர் கமல்ஹாசனே கோவை தெற்கில் தோல்வியை தழுவினார். மிகவும் குறைவான வாக்கு வித்தியாசத்தில் அவர் தோல்வியை தழுவியிருந்தாலும் அது மிகப்பெரிய அதிர்ச்சியை அக்கட்சி நிர்வாகிகளுக்கு ஏற்படுத்தியது. இதையடுத்து, கட்சி நிர்வாகிகளிடம் பேசிய கமல்ஹாசன், கட்சி விரைவில் மறுசீரமைக்கப்படும் என்று எச்சரிக்கை விடுத்திருந்தார்.

இந்த நிலையில், மக்கள் நீதி மய்யம் கட்சியின் துணைத் தலைவர் ஆர்.மகேந்திரன் அக்கட்சியின் இருந்து விலகியுள்ளார். தனது ராஜினாமா கடிதத்தையும் கட்சி மேலிடத்திடம் அவர் சமர்ப்பித்துள்ளார். கட்சியில் இருந்து விலகியுள்ள ஆர்.மகேந்திரன் வெளியிட்டுள்ள அறிக்கையில், கட்சி வெளிப்படைத்தன்மை இல்லாமல், ஜனநாயக விரோத முறையில் செயல்பட்டு வருவதாகவும், கமல் ஒரு சில நபர்களால் தவறாக வழிநடத்தப்படுகிறார் என்றும் குற்றம் சாட்டியுள்ளார்.


மேலும், வேட்பாளர் தேர்வு, தேர்தல் அறிக்கை, கூட்டணி, தொகுதி பங்கீட்டில் தொடர்ந்து குழப்பத்தை ஏற்படுத்தி வந்த சங்க்மா சொலியூஷன்ஸ் தலைவர் மற்றும் கமல்ஹாசனின் ஆலோசகர் கையில் தேர்தல் பொறுப்புகளை ஒப்படைத்ததால் தோல்வியடைந்ததாகவும் மகேந்திரன் சுட்டிக்காட்டியுள்ளார்.

மகேந்திரன் ராஜினாமா

அதேபோல், மக்கள் நீதி மய்யத்தில் துணை தலைவர் பொன்ராஜ், பொதுச்செயலாளர்கள் சந்தோஷ் பாபு. சி.கே.குமரவேல், மவுரியா, பொதுச்செயலாளர் முருகானந்தம், நிர்வாக குழு உறுப்பினர் உமாதேவி உள்ளிட்டோரும் ராஜினாமா செய்துள்ளனர். கட்சியை சீரமைக்க வேண்டிய கட்டாயம் உள்ளது. தலைவர் கமல்ஹாசனுக்கு அனைத்து உரிமைகளையும் வழங்கி அனைத்து நிர்வாகிகளும் பதவி விலகுகிறோம் என்று துணைத் பொன்ராஜ் தெரிவித்துள்ளார். 

முன்னதாக, கமீலா நாசர் ராஜினாமா செய்த நிலையில், தற்போது மக்கள் நீதி மய்யத்தின் முக்கிய நிர்வாகிகள் ராஜினாமா செய்துள்ளது அரசியல் அரங்கில் பரபரப்பை ஏற்படுத்தியுள்ளது.